Dëshmitari Nuredin Ibishi gjatë dëshmisë së tij në Hagë pohoi se disa nga rojtarët e pyjeve në zonën Operative të Llapit dyshoheshin si bashkëpunëtorë të autoriteteve serbe.

“Po. Jo të gjithë, por disa”, u përgjigj Ibishi në pyetjen e prokurores Silvia D’Ascoli, raporton “Betimi për Drejtësi“.

Pas kësaj, dëshmitarit iu paraqit një dokument që sipas prokurores ishte urdhër i Policisë Ushtarake i nënzonës së Llapit i lëshuar në vitin 1998 dhe që urdhëronte ndërprerjen e menjëhershme të prerjes së pyjeve për qëllim tregtie apo bashkëpunimi me pushtetin.

Për këtë dokument, dëshmitari tha se nuk e ka parë as atë dhe as formatin e tij, por shpjegoi se pse konsideroheshin si të dyshuar për bashkëpunim me pushtetin rojtarët e pyjeve dhe ata që kanë prerë pyjet në mënyrë ilegale.

“Dyshoheshin ngase në vazhdimësi bënin, ishin në pjesë rurale, pjesë malore ku ata kryheshin detyrën dhe e dishin për pozicionet tona dhe normal ndër tjerë prerësit e druve që prisnin dru në mënyrë ilegale, ata i shfrytëzonin për bashkëpunim dhe shpesh i informonin autoritetet serbe për pozicionet tona. Nuk dua që komunitetin e tyre ta… por një pjesë e tyre ka qenë e involvuar në dhënien e informacioneve. Madje, në disa raste janë vrejtur duke i parapri, sa kam dëgju ka pas raste që i kanë udhëheqë njësitet edhe ushtarake edhe policore-paramilitare në drejtim të pozicioneve tona ngase e kanë njoftë terrenin mirë si pylltarë. Këtu flas për raste të caktuara dhe të dëgjuara”, tha Ibishi.

Ai tha se autoritetet serbe i shfrytëzonin prerësit ilegal të pyejeve, duke iu dhënë leje për tregti ndërsa si kundër-shërbim kërkonin informacion për UÇK-në dhe pozicionet e tyre.

“Nganjëherë ata që kishin bashkëpunëtorë, pra autoritetet serbe të instaluara në Kosovë, ata i shfrytëzonin prerësit e pyejeve ata ilegalë që në një formë t’iu jepin leje si kundër-shërbim ata i ofronin shënime për pozicionin qoftë të forcave, qoftë edhe të dhënave të tjera që ishin në interes të misionit të ushtrisë ose pjesës civile ku ne e kishim zonën e përgjegjësisë”, tha Ibishi.